توثيق أسماء المقبوض عليهم والمفقودين والإصابات فى أحداث 28 يونيو

جبهه الدفاع عن متظاهرى مصر ترغب فى توثيق الاصابات ورفع قضايا للمصابين جراء احداث التحرير 28 يونيو نرجو المساعده فى نشر الأرقام وتجميع لبيانات المصابيين تمهيدا للاتصال بهم
لطلب مساعدة قانونية الاتصال بأرقام طوارئ جبهة الدفاع عن متظاهري مصر

0120624003- 01525472861

وللدعم الطبي اتصل بالأرقام التالية

0179901081 -0179901180

قائمة المقبوض عليهم

1- محمود سليمان خلف – 19 سنة
2- مصطفى السيد محمد.
3- على أحمد ثابت ( 14 سنة وتم ترحيله إلى قسم الشرابية)
4- فريد علي
5- محمد أشرف عبد الحليم
6- أحمد السيد حنفي محمود
7- محمد زين العابدين ( شقيق الشهيد أحمد زين العابدين وتم القبض عليه من أمام مسرح البالون)
8- أمال سالم ( تم ترحيلها إلى قسم شرطة)
9- شروق أحمد( تم ترحيلها إلى قسم شرطة)
10- فرح محمد( تم ترحيلها إلى قسم شرطة)
11- لؤى مصطفى محمد نجاتي (السجن الحربى)
12- مصطفى حمادة عبد الواحد – 19 سنة
13- فريد عبد العاطي
14- محمد السيد حنفي -ممسوك من البالون

قائمة بالمختفين حتى 29 يونيو

1- حسام الدين مصطفى أبو دوح
2- محمد فؤاد
3- أحمد سليمان
4- فرج عبد الحافظ
5- محمود مختار إسماعيل
6- احمد محمد مولد جابر الفقي 18 سنة
7- أحمد حنفي زغلول
8- فريد عبد العاطي

المزيد »

Posted in: قمع وإعتقالات

ضابط شرطة يعتدي على شاب بالسب والضرب ويحتجزه بالقسم لمجرد أنه من مصابي الثورة

عندما تفقد أغلي ما لديك من أجل وطنك .. ثم تفاجىء أن جزاؤك هو الإهانة والسب والحبس
لا لشىء الا لأنك ضحيت من أجله ..
هل تستطيع العيش ؟؟

شهادة محمد مجدي
(ملحوظة :الشهادة بها بعض الألفاظ المسيئة ولابد من نقلها كما هي)

الاسم / محمد مجدى
طالب بكلية الأداب الفرقة الثالثة
التهمة / أنى من مصابى الثورة حيث فقدت عينى فى أحداث ثورة 25 يناير

كنت أسير فى منطقة فيصل شارع العشرين يوم الثلاثاء الموافق 15/6/2011 حيث كنت راكبا توكتوك وفجأة استوقف التوكتوك رجال المباحث وانزلونى من التوكتوك وشدونى من الحزام فأعتقدت أن الموضوع به لبس فقولت للظابط بالراحة هوا فيه ايه فقام ضاربنى فى صدرى وقالى انت ايه الى معورك فى عينك ياروح امك فقولتله انا من مصابين الثورة فقالى ( أنت مصاب ثورة ياحيلة أمك تعالى على جنب) فبقوله حضرتك عيب كدا ممكن تعاملنى بأسلوب محترم أو تاخدنى القسم بس من غير ما تقل أدبك عليا فقالى ما انا كدا كدا هاخدك ياروح أمك انتى متصاب فين فقولتله فى التحرير فقالى تحرير جاتكو 60نيلة مش التحرير دا الى( كنتو بتنطو على بعض فيه ياولاد الوسخة ) واخدنى القسم وهوا بيركبنى العربية قالى على فكرة أنا اسمى( ملازم أول محمد نجيب) علشان لو عاوز تشتكينى واخدنى على القسم وهناك الظابط بيسألنى انت عملت ايه فقولتله ما عملتش حاجة فقام الملازم وقفنى على جنب واتكلم مع الظابط وقام عاملى محضر ( سب وقذف وتعدى على السلطات) ودخلنى الحجز وقالى( ادخل بقى ياروح امك اتظبط جوا دا انتو عيال سيس لو طلع عليكو بلطجى هيقلبكو انا عارف العيال الى جاتلكو التحرير دى ما عرفتش تقلبكو ليه ياولاد الوسخة يالى كنتو بتنطو على بعض فى التحرير) ووانا اول مرة فى حياتى أدخل قسم شرطة ودخلنى الحجز وكنت خايف من الى جوا بصراحة وكنت منهار فالناس جوا شافونى بصراحة صعبت عليهم واتعاملو معايا كويس فى الحجز وبعد كدا عرضونى على النيابة فوكيل النيابة من قبل ما اتكلم ( قالى انا عارف انك ما عملتش حاجة لانك شكلك محترم جدا وابن ناس بس هما راجعين مكسورين وانا مش هقدر اعملك اى حاجة غير انى اخلى سبيلك على ذمة القضية) فخرجت من النيابة روحت على مديرية أمن الجيزة للواء/ محمد كمال الدالى مدير الادارة العامة لمباحث الجيزة وحكتله الى حصل فقالى تلاقيك رديت عليه يامحمد فقولتله انا لو رديت عليه مش هاجى لحضرتك فقالى عموما انا هشوف الموضوع وابقى ارد عليك ومن يومها ولا عمل حاجة فدا إلى خلانى اروح اقدم بلاغ للنائب العام .
اقسم بالله انا ما بدور على حقى انا بس انا بدور على حق كل مصرى حصله وهيحصله كدا زيي احنا عاوزين معاملة أدمية محترمة مش أكتر من كدا

الظابط اسمه : ملازم أول / محمد نجيب
قسم شرطة بولاق الدكرور

وأعتذر عن الكلام المسئ الموجود ولكن هذه هي الحقيقة ولابد من نقلها كاملة
وأعلنت حركة شباب من أجل العدالة والحرية تضامنها مع الطالب محمد مجدى
للإستعلام عن أى تفاصيل بالقضية
waled.azeem1@gmail.com

دى صورة محمد مجدى قبل اصابته فى احداث يناير حيث فقد احدى عينيه

المزيد »

Posted in: انتهاك حقوق إنسان,جرائم الشرطة

نداء عاجل لتقديم بلاغات بالانتهاكات - كل من تعرض للانتهاكات على يد أفراد من الجيش أو الشرطة العسكرية

تناشد مجموعة “لا للمحاكمات العسكرية للمدنيين” كل من تعرضوا لانتهاكات على يد أفراد من الجيش أو الشرطة العسكرية, و الراغبين بتقديم بلاغات رسمية بخصوص الانتهاكات, التوجه لأي من الأماكن التالية لتسجيل شهاداتهم:

مركز النديم : ٣أ شارع سليمان الحلبي متفرع من شارع رمسيس

مواعيد العمل من الساعة العاشرة صباحا للساعة الثالثة مساءا كل يوم ما عدا الخميس و الجمعة

مركز هشام مبارك للقانون: 1ش سوق التوفيقية – الدور الخامس – وسط البلد – القاهرة

مواعيد العمل من الساعة العاشرة صباحا للساعة الخامسة مساءا كل يوم ما عدا الجمعة و السبت.

يرجى احضار أي مستندات – ان وجدت- تدعم شهادتكم (تقرير طبي, صور, فيديو,…) .



يعتزم المحامون التوجه صباح الأربعاء الموافق 22 يونيو 2011 لتقديم البلاغات في النيابة العسكرية.

للاستعلام:

الخط الساخن للنديم للابلاغ عن أي حالات تعذيب

0179901180

0179901081

المزيد »

Posted in: فعاليات

اعتقال شاب من أمام وزارة الدفاع خلال تواجده فى وقفة لأهالي مدنيين يواجهون أحكاما عسكرية

السبت 18 يونيو 2011

قامت الشرطة العسكرية بإعتقال شاب يدعي محمد أحمد ابراهيم إكرامي خلال تواجده فى وقفة أمام وزارة الدفاع ، للإحتجاج على الأحكام العسكرية الصادرة بحق مدنيين ، والشاب هو أحد أقارب المدنيين المحكوم عليهم بأحكام عسكرية

تصوير : سحر عبد المحسن

الشاب المعتقل

تم احتجاز الشاب فى بناية ، مباشرة بعد اعتقاله

السيارة التى حملت الشاب بعد اعتقاله

أحد العاملين بوزارة الدفاع يصور الوقفة


الشرطة العسكرية تفرق المحتجين

المزيد »

Posted in: قمع وإعتقالات

مسلسل تكميم الأفواه .. استدعاء الصحفية رشا عزب للنيابة العسكرية بسبب تحقيقها المنشور عن المحاكمات العسكرية وانتهاكات الجيش

السبت - 18 يونيو 2011

تم استدعاء الصحفية رشا عزب للمثول للتحقيق أمام النيابة العسكرية غدا التاسع عشر من يونيو 2011 ، هي ورئيس تحرير جريدة الفجر عادل حمودة ، بسبب تحقيقها المنشور فى الجريدة عن المحاكمات العسكرية والانتهاكات الموثقة من أفراد الجيش وكشف العذرية الجبري الذى تعرضت له فتيات تم اعتقالهن من ميدان التحرير .

أيضاً احتوي التحقيق على تفاصيل لقاء بعض أعضاء المجلس العسكري ، ومنهم اللواء الروينى ، بوفد من مجموعة لا للمحاكمات العسكرية ، وتقديم أدلة موثقة ، بالفيديو والتفاصيل عن انتهاكات الجيش وتعذيب شباب الثوار .

كما استمع أعضاء المجلس لشهادة بعض من تعرضوا للتعذيب والاهانة ومنهم فتاة ممن تم اجراء كشوف العذرية لهم فى السجن الحربي بعد اعتقالها يوم 9 مارس من ميدان التحرير

صور المقال

المزيد »

Posted in: قمع الرأي والحريات

قفص بدون متهمين. وبلطجية داخل جلسة محاكمة قتلة المتظاهرين بالمنصورة .. بتاريخ 12 يونيو

الشهادة لمحمد صبري - المنصورة

وصلت الصبح لمجمع المحاكم في المنصورة تقريبا بعد 9 ونص صباحا بدقائق .. لان الجلسة ميعادها في الوقت ده .

عدد المتظاهرين كان قليل نوعا ما ... وقفت وهتفت معاهم لعلّ القاضي يسمع صوتنا ويعرف اننا عاوزين ناخد تارنا .

سمعت ان اخو الشهيد محمد جمال سليم كان بيتكلم عن كمية الضغوط والتهديد اللي بيشوفوه علشان يتنازلو عن القضية , واخرها ان القتلة عرضو عليهم مليون جنيه علشان يتنازل عن القضية .. وان احسنلهم يتنازلو عن القضية وياخدو الفلوس .. لان كدا كدا سعادة الباشا هياخد براءة !!!

اكتر شيىء كنت مستغرب له هو كمية التأمين المبالغ جدا فيه قدام مجمع المحاكم

وكأنهم متوقعين هجوم من اسرائيل !!

عدد 7 عربيات امن مركزي من اليمين ,, و10 في الشمال ,, ومدرعتين للجيش و2 عربات مصفحة للشرطة العسكرية ,, ده غير عربيات الاسعاف والمطافي وعربيات الشرطة .

عربية الشرطة دي كان فيها ظابط امن دولة معروف لنا من ايام المظاهرات

جيش عساكر الأمن المركزي كان عامل كردون حوالين كل ده ,, بطول الشارع من اوله لاخره وقافلين طريق المرور قدام المحكمة .

اخدت صاحبي وقلنا ندردش مع عساكر الأمن المركزي ,,وسألتهم :

ايه يا شباب داخلين حرب ولا ايه ؟؟ هو انتو جايين هنا لتأمين المحكمة كل يوم ؟؟ ولا علشان ايه ؟؟

رد عليا العسكري . لا مش كل يوم.. هو النهارده بس .. علشان سعادة الباشا مدير الأمن "متهمينه " في قضية !

( مدير الامن اللي قتل اخواتنا .. لسه شغال برضه مدير امن .. ولسه بيقولو له يا سعادة الباشا )

هو لو كان القاتل أمين شرطة ولا غفير ... كان التأمين بقى بالمنظر ده ؟؟؟

رجعت تاني لمكان المظاهرة وانا اكتم غيظي .. واللي ضايقني اكتر ان مجموعة نشطاء سياسيون قالولي هو مخبرين أمن الدولة بيعملو ايه هنا مع ظباط الشرطة !!! وفيه ناس من الجنود كانو بيصورونا ؟؟؟ ليه ؟؟؟

مخبرين امن الدولة واقفين مع الشرطة

وبعد ساعة كاملة أو اكتر ... اكتشفنا ان الجلسة بدأت حالا !!! ,,,

يمكن القاضي كان مفكرها قضية سرقة حبل غسيل !!!

قررت انا وعادل ورشوان وموسى نطلع المحكمة فوق في الدور الاخير علشان نتابع القضية من داخل المحكمة ..

بعد ما عدينا من جيش عساكر الامن المركزي , ودخلنا من البوابات اللي كان واقف عليها ظباط الجيش .. وعدينا البوابات الالكترونية ... تخيلو .. البوابات الالكترونية كانت شغالة في مجمع المحاكم والله العظيم !!! ,, وكان واقف عليها عساكر كمان ... وكله كان معاه سلاحه طبعا !!

وطلعنا على السلم ,,, وأقسم بالله العظيم كان العساكر قاعدين على درجات السلم ... اقسم بالله العظيم كأني داخل لمعركة حربية !!! لدرجة اني صرخت فيهم .. انتو لو بتحاكمو مبارك نفسه مش هتأمنوه كدا !!!

انتو بتعملو معاه كدا ليه ؟؟ انتو مهتمين بيه اوي كدا ليه ؟؟؟ ده قتل اخواتنا ودمهم لسه على ايده !!!!

ودخلت القاعة اللي كانت مفتوحة وقدامها كتيبة جنود كاملة ,, واقسم بالله قدامها كتيبة جنود شرطة وجيش !!

الفوضى داخل القاعة كانت مش معقولة ابدا !! ,, العدد كان ضخم ,, وقفص الاتهام محدش يشوف حاجه جواه لأن فيه حوالي 10 بلطجية محاوطين القفص وواقفين علشان محدش يشوف اللي جواه .

ايوه 10 بلطجيه ,, وأمناء الشرطة اللي كانو واقفين حواليهم عارفين انهم بلطجية .

وظباط الجيش اللي كانو محاوطين امناء الشرطة كانو عارفين انهم بلطجية .

وكل اللي قاعدين في القاعة عارفين انهم بلطجية ,,

محامي الشهداء كان بيطالب القاضي انه يشوف بنفسه المتهمين ,, فين المتهم يا سيادة القاضي وكبار معاونيه ؟؟ القفص فاضي يا سيادة القاضي ؟؟؟.

يرد عليه بزعيق واحد من محامين مدير الأمن – المحامي المشهور اللي أجره بمئات الألاف – وتحصل فوضي ..

يزعق القاضي .. انا هنا سيد الجلسة ,, محدش يقوللي اعمل وما تعملش .. انتو اللي تسمعو الكلام ..

محامي الشهداء يستحلف القاضي .. يترجاه انه يحبس المتهمين لحين الجلسة الجاية بسبب وجود ادلة كافية لادانتهم .

اللي رافع ايده ده المحامي .. اصله مينفعش يقف منه للقاضي علطول .. عيييب

والجلسة تستمر ,, صوت زعيق جاي من ورا .. عاوزين نشوف المتهمين !!! ,, والقاضي يرجع يزعق ويعلق الجلسة دقايق !!!

مجموعة من النشطاء استفزهم الموقف وزعقوا " كلاب بتحمي كلاب ... كلاب بتحمي كلاب " والشرطة والجيش يسحبوهم بره القاعة .

رحت عند القفص اصوره ,, لقيت القفص فاضي ! ,, يمكن سعادة البيه الباشا مدير الأمن لقى القفص مش أد المقام !

القفص فاضي !!!

وبدأت تاني الجلسة في هدوء حذر .. الكل خايف يتكلم للقاضي يلغي الجلسة .. في نفس الوقت البلطجية اللي واقفين ورا أمناء الشرطة اللي واقفين ورا ظباط الجيش عمالين يزعقو ويشوشرو على القاضي .. والقاضي يبص لهم ويسكت !!!

معرفش القاضي سكت لهم ليه ؟؟ يمكن علشان هو كمان عارف انهم بلطجية ؟؟؟

المهم استمرت الجلسة دقائق ورفعت للمداولة ..

ورجع القاضي ... وكان قراره ,, تأجيل القضية لشهر سبتمبر , واخلاء سبيل المتهمين !!!

وأمر انه ياخد شهادة بعض ظباط وعساكر الأمن المركزي " بيطلب من الداخلية تحلف يعني " وتخيلو الأغرب

.. امر النيابة بجرد الفارغ من رصاصات الأمن المركزي أثناء الثورة !!!!! .

جرد فارغ الرصاصات اثناء الثورة ازاي ؟؟ ده منظر قرار يطلع من قاضي ؟؟؟

المهم ان سعادة الباشا مدير الامن وكبار مساعديه ,, تم اخلاء سبيلهم !!

سعادة الباشا مدير الامن وراه مسئوليات وناس بيقتلهم , قصدي بيحميهم ,, حبسه اخلال بالأمن طبعا .. مينفعش يتحبس ..

آآآه لو تشوفو الصرخة المكتومة من ام الشهيد ,, اقسم بالله تبكو بدل الدموع دم ..

آآآه لو تشوفو قهرتها ودموعها ... شافت ابنها بيتقتل تاني قدام عينيها ..

الغضب اشتعل في القاعه وبدأت اهتف انا واصحابي والدموع في عينينا ضد الداخلية وضد بطىء العدالة ..

مسك الميكروفون رتبة في الجيش وقال " اطلعو بره .. وجودكم ملوش لزمة .. قرار القاضي طلع ومحدش يقدر يرجعه !! " .

ظابط الجيش اللي عارف ان في القاعة بلطجية .. بيطردنا احنا منها ..

خرجنا من القاعة .. وكل الأمناء والظباط والعساكر كل واحد فيهم كان بيبص لنا ويضحك كأنه شمتان فينا ! ,,

كأن كانت بينا حرب وهم فازو !

لدرجة ان مجموعة ظباط ورتب في الداخلية كانو قاعدين في قاعة بيدخنو وشافونا واحنا بنهتف .. وقفو يبصوا علينا ويضحكوا بصوت عالي !!

,,, يارب ما تشوفوا اللي انا شفته !!

انا ببلغ وزير الداخلية : لو عايز تعرف سبب التغيب الأمني ... بهوات الداخلية كلهم كانو في مجمع المحاكم النهاردة .

انا ببلغ وزير العدل : اذا كان ده النظام القضائي المصري ,, فانا كمصري لا اثق في نظامنا القضائي .

انا ببلغ رئيس الوزراء: انت قلت لنا في التحرير .. لو مش هقدر احقق لكم اهداف الثورة هستقيل واقف معاكم ..

انا بس عايز اقوللك ,,, هي فين الثورة دي ؟؟ احنا معملناش ثورة يا دكتور .. معملناش ثورة

المزيد »

Posted in: فساد المحاكم والقضاء

بـيان صحفي بخصوص لقاء مجموعة “لا للمحاكمات العسكرية للمدنيين” مع المجلس العسكري

إضغط على البيان للتكبير

المزيد »

عرفه حمزة:ضابط شرطة عذب مواطن وقتله وحُكم عليه بالحبس .. ثم أصبح مفتشا لمباحث شمال الجيزة بعد الثورة

المصدر: مركز النديم

كتب : عايدة سيف الدولة - مركز النديم

بتاريخ 19/12/2002 حكمت محكمة جنايات الجيزة على المتهم المقدم عرفة حمزة محمود حسن بالحبس سنة مع الشغل مع الشغل لمدة سنة واحدة لأنه قام يوم 12 يوليو 1999 بدائرة قسم العمرانية "بضرب المجنى عليه أحمد محمود محمد تمام عمدا مع سبق الإصرار.. وتعدى عليه باجسام صلبة.. بعضها ذو سطح خشن، وقام بصعقه عن طريق تعريض خصيته وكيس الصفن لمصدر كهربائي مكشوف ذو فولت عالى فأحدث به الإصابات الموصوفة بتقرير الصفة التشريحية والتى اودت بحياته. ولم يقصد بذلك قتله ولكن الضرب افضي إلي موته".
هكذا تدخل المقدم حمزة محمود حسن مجاملة لأحد أطراف مشاجرة بين شابين فعذب الطرف الآخر لمدة ثلاث أيام متتالية حتى أرداه قتيلا.
كان ذلك في عام 1999. لماذا نفتش في الدفاتر القديمة؟
لأننا تلقينا بلاغات بأن هذا الشخص ذاته الذي قتل تمام في عام 1999 والذي كان يفترض ان يفصل من وظيفته بل وأن يحاكم بعد الثورة مرة ثانية على جرائم التعذيب التي لم يحاسب عليها.. بلغنا أنه مازال يعمل في وزارة الداخلية وأن منصبه فيها قد ارتقي بعد الحكم عليه فأصبح مفتش لمباحث شمال الجيزة وعاد الى عمله كما اعتاد يروع المواطنين ويضغط على أهالي الشهداء لسحب الشكاوى المقدمة للقضاء في جرائم قتل المتظاهرين كما بلغنا انه يتزعم فرق الضبط علي المواطنين في منطقة إمبابة بعد أحداث كنيستى مار مينا والعدرا .. وأن عمليات القبض هذه تتم بشكل عشوائي كعهده السابق بعد أن سمح هو وزميله الضابط حسام فوزى للسلفين بدخول الكنيسة للتفتيش بعد دعوى السلفيين باحتجاز عبير بداخلها.
إن مركز النديم يذكر الجهات المعنية ان شرارة الثورة التي جاءت نتيجة تراكمات الطلم والقهر والقمع أشعلتها دعوة للتظاهر يوم عيد الشرطة احتجاجا على سياسات التعذيب.. وان تركة الداخلية من اعتقالات وتعذيب وقتل قد تضاعفت بعد ان اضيف اليها شهداء ومصابي الثورة.. وأنه لا أقل اليوم من أن نطالب بضرورة إبعاد كل من هم موضع اشتباه في جرائم الاعتداء علي المتظاهرين من جهاز الشرطة لحين الانتهاء من نظر القضية، كما نطالب بإبعاد كل المتورطين في جرائم التعذيب في عهد النظام السابق من عملهم بالجهاز إن صدقت النيه في أن تكون الشرطة في خدمة الشعب وليست سيفا مسلطا علي رقاب المواطنين.

المزيد »

Posted in: انتهاك حقوق إنسان,جرائم الشرطة,قمع وإعتقالات

ضابط يعتدي علي فتاة ويحيلها للنيابة العسكرية

كتب -محسن سليم ومحمد جمعة:

مازال سيناريو اعتداء ضباط الشرطة علي المواطنين لم ينته وكأن الثورة لم تقم، حيث تعرضت منذ ايام طالبة بكلية الاعلام تدعي مي متولي السيد متولي للتعدي بالضرب والسب من قبل ضابط شرطة يدعي المقدم عمرسعد ابو اليزيد بقسم شرطة الدقي.
وتروي القصة لبوابة الوفد فاتن قاسم والدة الفتاة مي، قائلة: كانت ابنتى مي تقود سيارتها يوم 24مايو الماضى بالقرب من مسجد مصطفي محمود بشارع جامعة الدول العربية لتفاجأ باستوقافها من قبل المقدم عمر سعد ضابط قسم شرطة الدقي بسبب سرعتها الزائدة، وقام بسبها بألفاظ نابية وتعرض لها بالضرب في الشارع هي وصديقتها، وعندما دافعت عن نفسها بقولها: انتوا رجعتوا بنفس الإسلوب تاني قام باصطحابها إلي قسم شرطة الدقي.
وتابعت فاتن: تعرضت مي وزميلتها للاعتداء داخل القسم علي ايدي الضباط وقاموا باحتجازهن داخل الحجز طيلة الليل ليبدأ التحقيق معهن الساعة الرابعة فجرا بتهمة سب ضابط شرطة وحرر المحضر برقم 644 ورغم وجود 20 شاهدا أكدوا أنها لم تقم بسب المقدم الا ان المقدم ادعى وجود تسجيلات فيديو للسب.
وأشارت إلى أنه بعد اجراء التحقيق معها تم تحويلها للمحاكمة العسكرية التي من المقرر اجراؤها الثلاثاء المقبل بمحضر النيابة السكرية رقم 1644،قائلة:عندما عرضت المصالحة على الضابط طلب منى تقديم اعتذار فى جميع القنوات الفضائية حتى يتصالح وكأننا نحن من أذنبنا .

شاهد أم الفتاة تروي القصة

المزيد »

Posted in: انتهاك حقوق إنسان,جرائم الشرطة,قمع وإعتقالات

جريمة خالد سعيد تتكرر بالفيوم . مصرع طالب على يد مخبر شرطة واصابة زميله

الخميس 9 يونيه 2011م
الدستور الأصلى

لقى أحد الطلاب يدعى محمد محمود عبد الحميد ( 17 ) سنة مقيم بقرية تلات بمركز اشبواي التابع لمحافظة الفيوم مصرعه على ايدي رجال الشرطة واصيب زميله بإصابات خطيرة ويدعى مصطفى بلال(16) سنة مقيم بنفس القرية وزميله بمدرسة مبارك كول.

وترجع تفاصيل الواقعة في الساعات الأولى من صباح الخميس عندما شاهد اربعة مخبرين شرطة شابين يستقلان دراجات بخارية واشتبه فيهما على انهم من البطجية ولم يمنح المخبرين مهلة لانفسهم للتأكد من الشابين وعلى الفور اعتدوا عليهم فأصيب مصطفى ولفظ محمد أنفاسه.

واكد شاهد عيان على الواقعة انه شاهد اربعة مخبرين شرطة يرتدون ملابس مدنية ويقفون على حدود الطريق الدائري في ساعة متأخرة من الليل وعندما شاهدوا الشابين مستقلين الدراجة هاجموهم بالشومة على الفور دون توجيه أي أسئلة لهم.

وتوجه أهالي الشابين الى قسم شرطة ابشواي بعدما علم بهروب المخبرين من منازلهما وأصروا على اقتحام مركز الشرطة إلا أن مأمور المركز العميد عمرو أبو جليل استعان بقوات الجيش لتأمين قسم الشرطة.
وأصر اهالي الشاب المتوفي على عدم دفن الجثة لحين القبض على مخبرين الشرطة وإعدامهم علنا أمام الجميع، كما هدد أهالي الشاب المصاب بقتل المخبرين إذا تعرض ابنهم للوفاة.

المزيد »

Posted in: انتهاك حقوق إنسان,تعذيب وقتل,جرائم الشرطة

ضابط شرطة يصيب مواطن بطلقات نارية والداخلية تنكر الواقعة وتحبس الشهود

Deja-vu - نقلاً عن مدونة

حسن صبحي حسين 28 سنة سائق توكتوك بالعمرانيه وأثناء سيره في اتجاه مخالف استوقفه ضابط مرور يدعي عيسي السيد راشد وقام برفع التوكتوك علي ونش المرور وبعد رجاء السائق للضابط أن يتركه :

دي رواية الداخليه :

http://tinyurl.com/3g3w3p4

وبالنسبة لرواية أهل المجني عليه :

سواق التوكتوك انطلب منه 200 جنيه علشان يخلوه ياخد التوكتوك ويمشي فاتصل بأخوه محمود صبحي حسين وقالله هات معاك 200 جنيه وأوراق التوكتوك وتعالي فالراجل جه وقعد يتحايل عالظابط علشان المبلغ دا كبير (إضافه:الشهود أكدولي انه دفع المبلغ بس أصر انه ياخد إيصال باللي دفعه فيما بعد الكلام دا عرفته بعد ما كتبت التدوينه دي لذا لزم التنويه ) فالظابط قالله : هوا انت المحامي بتاعه يابن ال......اكه ... محمود قال للظابط امك مش أحسن من أمي ورد عليه الشتيمه فالظابط أمطره بسيل من الشتايم وقالله لو ممشيتش من هنا هضربك بالنار محمود قالله انت كداب ومش من حقك تعمل كده ... فالظابط طلع سلاحه الميري وهدد محمود اللي رفض يمشي من غير التوكتوك اللي بياكله منه عيش وصمم علي طلبه وحصلت مشاده كلاميه بينه وبين الظابط اللي أطلق عليه عيارين ناريين واحد في بطنه وواحد في أعلي فخذه الأيمن والناس شالوه وطلعوا ع مستشفي أم المصريين .. وجه ظابط مباحث من قسم العمرانيه قال انه عايز شهود الواقعه علشان يعملو محضر بيها وفعلا راح معاه اتنين شهود وأخو المجني عليه وقاله ان الظابط هواللي غلطان فاعتدو عليهم بالضرب في القسم ورموهم ف الحجز وعملولهم قضية تعدي عالسلطات وجابو شهود تانيين يشهدو برواية المباحث والنيابه قررت حبسهم 4 أيام علي ذمة التحقيق وبعدها جددتلهم 15 يوم تانيين وامباحث كانو مصممين ينقلو محمود م المستشفي لمستشفي السجن ولكن حالته ما سمحتش وكلبشوه ف السرير

أهل محمود نزلو التحرير يوم الجمعه 27 مايو يطالبو بحق ابنهم من الداخليه ومن ساعتها كل شويه رتبه تروح أوضة محمود في المستشفي يهروه شتيمه وتهديد ويمشوا ودلوقت محمود وأخوه مهددين بإنهم يتحبسوا ظلم بالرغم من إن الظابط هواللي أخطأ وخالف قواعد استعمال السلاح الناري المنصوص عليها في قانون هيئة الشرطه إضافة لإنه محدش عارف الإصابات اللي في المجني عليه اللي كانت ممكن تقتله بسهوله محدش عارف هتسيب فيه عاهه مستديمه وللا لاء ؟

وطبعا أنا مش مصدق رواية الداخليه إطلاقا لسبب بسيط هوا انهم قالو في بيانهم ان الظابط أطلق عيارين نار في الهوا وواحد علي قدم المجني عليه بس واضح انهم عندهم مشكله في العد ومشكله في معرفة القدم من البطن

وادي صورة محمود

محمود فى المستشفى - ملحوظة : يظهر الجرح بوضوح

التفاصيل كاملة ولقاء يسري فودة مع محامي الضحية مالك عدلي

تحديث : بالرغم من حالة محمود المتطلبة لرعاية خاصة الا أنه منذ أيام تم خروجه من المستشفى بأمر الشرطة وايداعه بحجز قسم شرطة الجيزة رغم التقارير الطبية التي توصي براحته وعلاجه والتغيير على الجرح يومياً
!!!!!!!!!

المزيد »

Posted in: انتهاك حقوق إنسان,تعذيب وقتل

الأمن المركزي يعتقل فلاحين من أمام مجلس الشعب ويفض مظاهرة بالقوة

الأربعاء 8 يونيو 2011

الأمن المركزي يعتقل فلاحين من أمام مجلس الشعب

Photo By:norashalaby

قامت قوة كبيرة من جنود الأمن المركزي بالاعتداء على فلاحي الأوقاف المشاركين فى مظاهرة اليوم أمام مجلس الشعب للمطالبة بتملك أراضيهم.
وقد قام الأمن المركزي باستخدام العنف تجاه المتظاهرين واحداث عشرات الاصابات فى صفوف المتظاهرين.

وحتى الآن توجد تأكيدات عن اعتقال 3 أو أكثر من الفلاحين والعاملين بالبحوث الزراعية ، حيث تم ايداعهم بسيارات الأمن المركزي .

والصورة لجنود الأمن وأفراد بملابس مدنية يقومون بإيداع المعتقلين بداخل سيارات الأمن المركزي

تحديث 9:20 مساءاً : الأعداد المؤكدة للمعتقلين اليوم 25 شخص

تحديث 11:58 مساءاً : أنباء عن وجود المعتقلين فى نيابة عابدين ، وعدد من المحامين متواجد معهم

المزيد »

Posted in: انتهاك حقوق إنسان,قمع وإعتقالات

أمن الدولة يحتجز ناشطة سياسية ويتعدي عليها بالضرب بمقر أمن الدولة

الناشطة السياسية سلمى الصاوى

تحكي تفاصيل اعتقالها أمس الاول :

اعتقالى الاول والاخير

( كتبت سلمى الصاوي )

* فى البدايه احب اعرفكم انا مين؟ انا سلمى الصاوى فى كليه السن ترجمه طبيه الى هنا فانا فتاه عاديه

لاتحمل الضغينه الى احد والعكس تبداء مشكلتى مع بدايه هذا السطر

انا من عائله اخوانيه و عضوه فى حركه شباب 6 ابريل

تضاداى اليكما انى : اخوانيه المنشاء والطباع ابريليه التفكير والانطباع ولانى اخوانيه

فانا من شباب الاخوان المنشقين

ندخل فى الموضوع :

بعد وقفه خالد سعيد , وقفنا عند وزاره الداخليه

كنت فى اكتوبر بالليل وانا مروحه نزلت الحصرى , جه ضابط جيش سالنى عن بطاقتى وانا مش معايا بطاقه , فنادى ضابط شرطه واخد كارنيه النادى بتاعى

وعرف اسمى , فقالى عاوزينك فى موضوع

ركبت معاه وغمى عنيا , وانا فى العربيه ووصلنا للمكان اللى دخلت فيه قعدت تقريبا ساعه لوحدى , وبرده ماكنتش شايفه حاجه

, بعد كده طلعونى على مكان تانى , وقعدونى على كرسي

والضابط بداء يسالنى عن ناس كتير فى الحركه فيه اللى اعرفهم ,وفيه اللى ما اعرفهمش ,وبدأ يسالنى عن علاقتى بيهم , ب احمد ماهر ومحمد عادل واحمد دومه ,وعواد ,وزايد ,واسماء محفوظ

فقلتله اعرفهم اسامى بس , انا اصلا مش بقابلهم كتير

بداء يسالنى عن اشاعه مقتل صفوت حجازى , و عن اخوان عندنا فى اكتوبر وليه انشقيت عنهم , ثم رجع تانى لموضوع اسماء محفوظ

وقالى : اسماء فين؟ , فقلتله : هى مسافره , قالى : مسافره ليه ؟ , قلتله ما اعرفش انا مش بتابع اوى , قالى : هى مسافره علشان تحصل على معونات خارجيه للاحزاب والحركات والمنظمات السياسيه فى مصر للانقلاب على المجلس العسكرى , انفعلت وقلتله : مستحيل انها تعمل كده

, قعد يزعق ويضرب فيا ,ويقولى : " انتوا فاكريين ان المجلس العسكرى ولا اللى جاى بعده هينفعكوا ده اقل حكم 3 سنين , واللى هيكسر اشاره مرور هياخد 5 سنين , واللى هيغلط هنجيبوا وهيتحاسب , واللى مش هيغلط هنجيبه ونلفقلوا "

و رجع يضرب تانى , و انا كنت بحاول افهمه رأيي , وان ده مش حقيقي وهو بيضرب ضربنى بعصايه على دماغى افقدتنى الوعى

بعد مافوقت قالى : " انتى هتخرجى دلوقتى بس ما تحاوليش انك تسافرى او تهربى احنا جبناكى من الشارع .. لا من بيت ولا من مقر ... يعنى لو اختفيتى فين هنلاقيكى ونجيبك ... احسنلك تفضلى موجوده احنا ممكن نحبسك لغايه ما اسماء ترجع .. او لغايه ما نبقى عاوزين نطلعك بس انا مش بحب العياط " , ونادى عسكرى وطلعنى بره وشال اللى على عينى

, بقيت فى الصحراء اللى عند مبنى امن الدوله اللى فى اكتوبر , على طريق هايبر

ده كل اللى حصل

بالنسبه بقى ان فى ناس بتقول انى كدبت الخبر ده , الموضوع ده مش صح انا ماكدبتش حاجه حصلت بالفعل , و تحت اى ضغط هافضل ثابته على كلامى , ومن ساعه ماحصل الموضوع ده وانا بقول نفس الموضوع .. وماكدبتش حاجه , يبقى مش عاوزه حد يألف , ربنا يهدينا واياكم اجمعين

.. عارفيين ايه اللى عمل فيا كده , واللى عمل فينا كلنا كده , ان احنا من جوانا منقسمين , اخوان وبقوا قيادات و وشباب اخوان , و6 ابريل منقسمين عز وماهر , طيب تفتكروا لما احزاب او حركات او جماعات بتنقسم , عاوزين الدوله ما تنقسمش : حاكم ومحكوم او شعب وجيش او شرطه , لازم نوحد صفنا , ونقوم كلنا نكمل المشوار , ربنا يهدينا ويغفر لنا *

نقلاً عن صفحة 6 أبريل

المزيد »

Posted in: انتهاك حقوق إنسان,قمع وإعتقالات

الشرطة العسكرية تختطف خمسة من عمال بتروجيت المعتصمين

نقلا عن موقع : مركز الدراسات الاشتراكية
بقلم:

أشرف عمر

2 يونيو 2011

قامت الشرطة العسكرية بالأمس، في حوالي الساعة الثانية ظهراً، باختطاف خمسة من عمال بتروجيت المعتصمين أمام وزارة البترول للمطالبة بالعودة إلى العمال بالشركة التي قامت إدارتها بفصلهم قبل قيام ثورة 25 يناير بأيام معدودة.

بدأ اعتصام حوالي 150 عامل من عمال بتروجيت أمام وزارة البترول منذ 22 مايو الماضي. ويبلغ عدد العاملين بالشركة حوالي 1500 عامل. هذا ويذكر العمال أن إدارة الشركة كانت دائماً ما تلقي عليهم وعوداً زائفة بالعودة للعمل مرة أخرى بالشركة، لكن الشركة لم ترسل إلى اليوم مندوباً واحداً للتفاوض مع العمال أو لبحث مشاكلهم، بعد أن مر على الاعتصام أمام وزارة البترول أكثر من عشرة أيام.

وصرح محمد دوبان، أحد المعتصمين، لموقع الاشتراكية الثورية، أن "العمال المفصولين لم يتمتعوا بأي تأمين طوال فترة عملهم بالشركة التي تعد أغنى شركة بترول في مصر. وقد علمنا اليوم أن زملائنا المختطفين سيقضون 15 يوم في الحبس، كما تلقينا مكالمة تليفونية من أحد ضباط الشرطة العسكرية لمساومتنا على فض الاعتصام إذا كنا نريد إخلاء سبيل زملائنا الخمسة (!!)”.

وأضاف دوبان أنه "بالرغم من نجاح ثورة 25 يناير في إسقاط مبارك، إلا أن مطالبنا لا تزال معلقة إلى اليوم، كما أن حقوقنا لا تزال مسلوبة هي الأخرى، كما أن الثورة المضادة اليوم في قطاع البترول يقودها رئيس الهيئة العامة للبترول، هاني ضاحي".

ويناشد مركز الدراسات الاشتراكية كافة القوى العمالية المناضلة للتضامن مع عمال بتروجيت من أجل انتزاع حقوقهم المشروعة في ظل شكوى العمال من التعتيم والتجاهل الإعلامي لقضيتهم واعتصامهم، وفي ظل تهديد الشرطة العسكرية لهم ومساومتها لهم بعد أن اختطفت خمسة منهم.

المزيد »

Posted in: انتهاك حقوق إنسان,قمع وإعتقالات